مساكم ازكى طبق لموسم الزيت 🙈 المسخن الفلسطيني حنزلكم الطريقة ❤️❤️
_____________
المسخن الفلسطيني:
بنسلق الدجاج مع المطيبات (بصل وورق الغار والهيل والقرفة والمسمار) وبس يستوي الدجاج بنصفي المرقة وبنتركها عجنب.
كمية البصل عحسب كمية الخبز احتجت ثلاثة كيلو تقريبا لاربع ارغفة طابون حجم كبير.
بنفرم البصل ناعم او خشن حسب رغبتكم وبنذبلو بكمية قليلة من زيت الزيتون وبنتركوا ثلث ساعة لتطلع مية البصل بنحط عليه رشة ملح وبنتركوا ليذبل مع التحريك كل فترة.
بس يذبل البصل بحط كمية وفيرة من زيت الزيتون مع البهارات (السماق بكمية منيحة وفلفل اسود وبهار المسخن ) وبنضبط الملح بالاخير.
بنوخذ البصل عجنب لندهن فيه الخبز وبنترك كمية قليلة من البصل بنزودوا بكمية من مرق الدجاج وزيت الزيتون وبنغط الارغفة في المرقة وبنوخذ كل رغيف بنحط عليه كمية من البصل مع المكسرات حسب الرغبة وبنكرر الخطوات مع كل رغيف وبنرتبهم فوق بعض.
لتحمير الدجاج بوخذ كمية من خليط البصل وبضيفلوا ليمون وسماق وملح وبهارات المسخن وبدهن فيه الدجاج وبحمروا.
بس يتحمر الدجاج بحطوا فوق الخبز اللي رتبناه وبدخلهم الفرن الدافي فقط ليسخن الخبز والف صحة وهنا ع قلبكم❤️
إرسال تعليق